Страница 19 из 19
Да не до конца на мя, грешнаго, прогневаешися. Ныне бо о сем всем болезненне жалею и жалети не престану. О, дабы Тя, Господа моего, не прогневал никогдаже! О, дабы был первее в мертвых вменен, неже Тя раздражити, Благаго Господа моего! Вскую родихся, вскую воспитан есмь, вскую и живу доныне, да Тя, Владыку моего, опечаляю тяжце? Да расседется ныне сердце мое болезнию, да распадется и сокрушится окаменение мое жалостию, да истаю весь, яко воск, внутренним горением, яко утратих Бога моего, отпадох благодати Его, оскорбих благоутробие Его, отчуждихся любления Его, отщетихся славы Его, отставихся от милостиваго присещения Его.
Да изведут исходища водная очи мои днем и нощию о сем, понеже не сохраних закона Твоего, понеже много преступих, много согреших пред Тобою; о сем смутися сердце мое, ниже бо тако трепещет муки, ниже тако о отпадении благ небесных изнемогает, яко о сем истаявает, яко Тя прогневах, всего Благаго, всего Сладкаго, всего Любезнаго, всего Вожделеннаго, о сем точию жалети не престану отныне и вовеки.
Да исчезнет в болезни живот мой и лета моя в воздыханиих, да изнеможет в болезни душа моя, и кости моя да смятутся о сем, яко Бога моего, Творца моего, Владыку моего, Искупителя моего опечалих тяжце. И что сотворю? Вем, яко Благ еси Ты, Бог мой, Милосерд ее и Ты, Создатель мой, Милостив и Щедр еси Ты, Искупитель мой, толико Милостив, яко и душу Свою не пощадел, но о нас, грешных, положил еси, и не по беззакониим нашим твориши нам, ни по грехом нашим воздаеши нам.
Се сотворю, у ног Твоих пречистых упаду, поклонюся и припаду и восплачуся пред Тобою, Господем, сотворшем мя. Аз бездна грехов, в бездну милосердия Твоего себе повергаю, Боже мой, и молю Тя: настави мя на истинное покаяние и приведи в чувство нечувственнаго и окамененнаго. Приял еси многих грешников кающихся: Давида, Манассию, Иосию, мытаря, блудницу, блуднаго сына, разбойника, Петра, Савла, Фотинию, Таисию, Пелагию, Марию Египетскую; не отрини мене, тех превозшедшаго грехами, не пришел бо еси призвати праведныя, но грешныя на покаяние.
Призови убо и мене, паче всех грешнейшаго; аше и ничтоже благо сотворих пред Тобою, но даждь ми по благодати Твоей положите начало благое; и сподоби мя, Господи, возлюбите Тя, якоже возлюбих иногда той самый грех, и поработати Тебе без лености, якоже поработах прежде сатане льстивому; наипаче же поработаю Тебе, Господу Богу моему Иисусу Христу, во вся дни живота моего, аще ми подаси благодать Твою в помощь.
Дивлюся воистину многому Твоему долготерпению, о, Всемилостиве, яко во время, в неже совершахуся моя беззакония, не навел еси на мя праведнаго Твоего суда, ниже мя обличил еси яростию Твоею, ни гневом Твоим казнил мя еси, ни с высоты молниею поразил мя еси, ниже повелел еси земли низвести мя во ад жива и ни коей-либо наглой смерти похитите мя попустил еси; и егда на мнозе сему удивляхся, познах, яко безмерное Твое милосердие моего покаяния ожидаше и скверному житию моему исправления долготерпеливне и милостивне ожидаше и без казни мя оставляйте, да прииду в чувство и познаю моя беззакония, и отстану от злаго моего начинания.
Се же познах и с покаянием к Тебе притекох, не сам собою, но Ты мя наставил и привел еси к Себе. И чесо ради сие сотворил еси, и что Тя подвиже к толикому милосердию, и кая Тебе потреба, да мя призовеши? Не вем; се точию вем, яко грешен и безответен есмь, и враг Твой бых доселе, и еще неисправлен; но понеже Ты Сам воззвал и привел мя еси пред Себе, просвети убо ум мой, отверзи ми уста, научи мя, что глаголати пред Тобою, и очисти многая моя беззакония, омый моя беззакония и мерзости, окропи мя иссопом милости Твоея, убели мя паче снега, да не мерзостен и сквернен стою пред Тобою.
Уне бо мне было бы негде в темных недрах земных быти сокровену, неже пред величеством неприступныя славы Твоея в толиком студе, и сице студне обнаженному и всему сквернами греховными окалянну и гнусну стояти, смотрящим на мя всем Твоим предстоящим Ти Херувимам и Серафимам. Но нигдеже есть место, могущее мя пред Твоима паче солнца светлейшима очима сокрыти.
Дивлюся же и недоумеваю о сем, како не гнушаешися толико мерзкими сквернами моими и попускаеши ми стояти пред Тобою и дерзостне, паче же реку, безстудне глаголати? Како не гнушаешися смотрети на нечистоту сердца моего и на мерзость души моея? Како предстатели Твои, внезапу огненными оружии воспретивше, не отринут и не отженут мя от Лица Твоего?
Како, возгнушавшеся мною, не ввергнут мя связана во тьму кромешную? Но не хошет сему тако быти Твое незлобие и крайнее благоутробие; многа бо, многа воистину милость Твоя, вышша небес, глубочайша бездны ада, пространнейша всея земли и моря благость Твоя, яже и моея погибели не хощет, но обращения ожидает и радуется о покаянии грешничи. Великая Твоя милость, Господи, егда долго терпиши мне, множицею обещавшему каятися и паки в таяже и лютейшая впадшу; множицею бо обещах покаяние и клятвами сие утвердих, обаче солгах, страстный.
Каюся, трепеща, неужели, Господи, поразиши мя? И по часе паки таяжде творю. Ты же и еще милосердствуеши о мне, не погубляя мя со беззаконьми моими. Слава долготерпению Твоему, слава милосердию Твоему, слава благоутробию Твоему, слава множеству щедрот Твоих, слава многому множеству благости Твоея, слава милостивому Лицу Твоему, Емуже ныне предстоя, Господи мой, приношу Тебе волю и намерение мое, в надежде помощи Твоея заложенное, отныне, от сего дне, от сего часа, от сея черты по силе моей злое и окаянное житие мое исправите, о прешедших же гресех до смерти болезновати и жалети, приходящих же опасно блюстися помощию Твоею буду.
Веси, Господи мой, яко ненавижду мерзких дел моих и самаго себе их ради и всесквернаго жития моего ненавижду и более ими Тя, Благаго Бога моего, раздражати не хощу; точию Ты, Господи, даждь ми помощь, без Твоея бо всесильныя помощи и благодати никако же могу от злых моих дел и греховнаго обычая отстати и ни единаго же блага дела творити, без Тебе бо не могу творити ничесоже.
Имею волю каятися, аще ми Ты, Боже, поможеши, можеши мя очистити. Господи, помози ми, и спасуся. Верую, Господи, Твоему благоутробию, помози моему неверию; верую, яко близ еси всем призывающим Тя во истине. Истинно, истинно, истинно хощу всем сердцем в покаяние обратитися к Тебе, Богу моему. Боже, в помощь мою вонми, Господи, помощи ми, потщися!
» После этого, встав от земли, утверждаясь в надежде на Господа и размышляя о Его великой благости и милосердии, читай псалом 102, чтобы утешилась душа твоя: «Благослови, душе моя, Господа, и вся внутренняя моя, имя святое Его», и прочее. Если же всех этих слов тебе невозможно будет объять памятью, тогда положи их в уме твоем краткими статьями таким образом: 1)
исповедую Богу моему все грехи мои; 2) считаю себя недостойным Его милосердия, но достойным вечных мук, 3) однако я не отчаиваюсь; 4) смиренно прощения прошу; 5) полагаю намерение исправить жизнь мою; 6) верую твердо, что будут прощены грехи мои. Тропарь и кондак святителю Димитрию Ростовскому Тропарь, глас 8 Православия ревнителю и раскола искоренителю, Российский целебниче и новый к Богу молитвенниче, списаньми твоими буих уцеломудрил еси, цевнице духовная, Димитрие блаженне, моли Христа Бога, спастися душам нашим.
Кондак,глас 8 Звезду Российскую, от Киева возсиявшую и чрез Новград Северский в Ростов достигшую, всю же страну сию ученьми и чудесы озарившую, ублажим златословеснаго учителя Димитрия, той бо всем вся написа, яже к наставлению, да всех приобрящет, якоже Павел Христу, и спасет правоверием души наша.
Список использованной литературы 1.
Творения святителя Димитрия Ростовского: в 3-х тт. — М., 2005. 2. Архиеп. Варфоломей. О пастыреводительном характере творений Святителя Димитрия, Митрополита Ростовского. — М., 1949. — Журнал Московской Патриархии. — № 1. 3. Тургенев И. С. Путешествие по святым местам русским // Тургенев И.С. Полн. собр. соч.: в 30-ти тт. — Т. 1.— М., 1978. 4. Лихачев Д. С.
История древнерусской литературы // Избранные работы: в 3-х тт. — Т. 1. — Л., 1987. 5. Зубов В. П. Русские проповедники: Очерки по истории русской проповеди. — Эдиториал УРСС, 2001.