Страница 18 из 19
Приими молебное пение сие от нас, недостойных раб Твоих, Тебе возносимое, и якоже древле грешника, на всяк день многажды пред честною иконою Твоею молившагося, не презрела еси, но даровала еси ему нечаянную радость покаяния и преклонила еси Сына Твоего многим и усердным к Нему ходатайством к прощению сего грешнаго и заблудшагося, тако и ныне не презри моления нас, недостойных рабов Твоих, и умоли Сына Твоего и Бога нашего, да и всем нам, с верою и умилением поклоняющимся пред цельбоносным образом Твоим, дарует нечаянную по коегождо потребе радость: грешником, погрязшим во глубине зол и страстей, - вседейственное вразумление, покаяние и спасение; сущим в скорбех и печалех - утешение; обретающимся в бедах и озлоблениих - совершенное сих избытие; малодушным и ненадежным - надежду и терпение; в радости и изобилии живущим - непрестанное Благодетелю Богу благодарение; бедствующим - милосердие; сущим в болезни и долго-недужии и оставленным врачами - нечаемое исцеление и укрепление; иждившим от недуга ум - ума возвращение и обновление; отходящим в вечную и нескончаемую жизнь - память смертную, умиление и сокрушение о гресех, дух бодр и твердую на милосердие Судии надежду. О Госпоже Пресвятая!
Умилосердися о всех чтущих всечестное Имя Твое и всем яви всемощный покров Твой и заступление: во благочестии, чистоте и честнем жительстве пребывающия до скончания их во благости соблюди; злыя благи сотвори; заблуждшия на путь правый настави; всякому делу благому и Сыну Твоему угодному споспешествуй; всякое дело злое и богопротивное разруши; в недоумении и трудных и опасных обстояниих обретающимся незримую помощь и вразумление с Небесе ниспосли, от искушений, соблазнов и погибели спаси, от всех злых человек и от врагов видимых и невидимых защити и сохрани; плавающим сплавай, путешествующим спутешествуй; сущим в нужде и гладе буди Питательница; неимущим крова и пристанища буди покров и прибежище; нагим подаждь одеяние, обидимым и неправедно гонимым - заступление; клевету, поношение и хуление терпящия незримо оправдай; клеветники и хулители пред всеми обличи; ожесточенно враждующим нечаемое подаждь примирение и всем нам - друг ко другу любовь, мир, и благочестие, и здравие с долгоденствием.
Супружества в любви и единомыслии сохрани; супруги, во вражде и разделении сущия, умири, соедини я друг ко другу и положи им союз любве неразрушимый; матерем детородящим скорое подаждь разрешение, младенцы воспитай, юныя уцеломудри, отверзи им ум к восприятию всякаго полезнаго учения, страху Божию, воздержанию и трудолюбию настави; от домашния брани и вражды единокровныя миром и любовию огради; безматерних сирот буди Матерь, от всякаго порока и скверны отврати я и всему благому и богоугодному научи, прельщенныя же и во грех и нечистоту впадшия, скверну греха отъявши, из бездны погибели изведи; вдов буди Утешительница и Помощница, старости буди жезл; от внезапныя смерти без покаяния всех нас избави и всем нам христианскую кончину живота нашего, безболезненну, непостыдну, мирну и добрый ответ на Страшнем Судищи Христове даруй: преставльшияся в вере и покаянии от жития сего со Ангелы и всеми святыми жити сотвори; скончавшимся внезапною смертию милостива быти Сына Твоего умоли и о всех усопших, иже не имут сродников, о упокоении их Сына Твоего умоляющих, Сама буди непрестанная и теплая Молитвенница и Ходатаица: да вси на Небеси и на земли ведят Тя, яко твердую и непостыдную Предстательницу рода христианскаго, и, ведуще, славят Тя и Тобою Сына Твоего, с Безначальным Его Отцем и Единосущным Его Духом, ныне, и присно, и во веки веков. Аминь.
Молитва повседневного исповедания человека, вступающего на путь спасения Боже Преблагий, благости источниче, милости бездно! Создателю, Искупителю и Спасителю мой! Тебе, ведущему сокровенная тайная и испытующему сердца и утробы, исповедую грехи моя и приношу пред всевидящее Око в слух всех Твоих Ангел и Архангел беззакония моя. Согреших, Господи мой и Творче (в том-то и том-то).
Се язвы и струпы, и гноения моя, о, Всемилостивый Врачу! Се тяжкая моя бремена, о, Благий Господи! Се студ мой и нагота моя, о, Долготерпеливый Судие! Сими деянии моими опечалих, прогневах и раздражих Твою благость; сими образ Твой оскверних, Духа Святаго Твоего оскорбих и Ангела, Хранителя моего, от себе отгнах; сими Кровь Твою дражайшую, за мя излиянную, попрах и ни во что же вмених; сими погубих красоту душевную, обнажихся благодати Твоея и сотворихся вертеп разбойников, жилище бесов и страстей; сими растлих Церковь, Твоею Кровию искупленную, скверня все тело мое, уды моя творя уды блудничи, оскверняя душу помышлении скверными, хульными, гордыми, мерзкими, блудными; сим соизволяя и в них услаждаяся, сими радость бых бесом, плачь же Ангелом, и умерла ми есть душа, лежит же, аки во гробе, зло в обычаи, перстию нечувствия присыпана и каменем ожесточения привалена.
Се, Господи, моя беззакония, превозшедшая главу мою, умножившаяся паче влас главы моея и паче числа песка морскаго. Сия исповедал, сам себе обличаю, осуждаю и винна себе творю, не точию же сия, яже вспомянух, но ихже не помню, и ихже не разумею, яко греси суть, и ихже исповести не умею, вся сия в превеликое милосердие Твое влагаю, Всемилостивый и незлобивый Боже.
По толиких же и толико многих делех моих студных, по толико великом ума моего помрачения и безумии, по толико лютых падениих и нечувствии едва в себе пришед и из глубины отчаяния моего на великое Твое всеми грехами людскими не преодоленное милосердие воззрех и уведех, яко не хощеши смерти грешника, но милостиво обращения его ждеши, и единых ради грешников Кровь Свою нещадно излиял еси, да призовеши их на покаяние.
Се уразумев, аз, окаянный, аз, грешный, превозшедый всего мира грехи, вторый злыми делы диавол, подражатель Иудин, распинателем общник, аз, окаянный и беззаконный, всяких мерзостей неопределимое море, всех нечистот бездонная пропасть, аз, скверный, всего зла делатель безстудный, прибегаю и припадаю к Тебе, Всемилостивому и Всещедрому, в болезни сердца моего с покаянием вопия: согреших, Отче, на небо и пред Тобою, согреших и беззаконновах, бых преступник заповедей Твоих, согреших, яко ин никтоже когда; несмь достоин нарещися сын Твой; несмь достоин воззрети и видети высоту небесную, несмь достоин отверсти уст моих пред Тобою, доселе быв враг Твой.
Но молю Твою благость и мольбу приношу Твоему незлобию: помилуй мя, Боже, по велицей милости Твоей и по многим щедротам Твоим очисти беззакония моя. Помилуй, прости и очисти, яко от Тебе очищение есть. Господи, аще хощеши, можеши мя очистити. Вем, яко хощеши всем спастися: спаси убо и мене, можеши бо, елика хощеши; преклонися, Господи, на милость, помяни древния милости и щедроты Твоя и прости моя согрешения; не помяни моих злых деяний, не вниди в суд с рабом Твоим, не воздаждь ми по делом моим, ни яростию Твоею обличи мене, ни гневом Твоим накажи мене.
Отверзи ми двери благости Твоея, отверзи ми двери покаяния, в покаяние мя приими и в разум призови, возстави падшаго, взыщи заблудшаго, обрящи погибшаго, исцели язвеннаго, воскреси мертваго. Господи Боже Сил! Обрати мя, яви Лице Твое, и спасен буду; Лице Твое просвети на раба Твоего. Доколе, Господи, забудиши мя до конца? Доколе отвращаеши Лице Твое от мене?
Отврати Лице Твое от грех моих, не отврати же Лица Твоего от мене, яко скорблю, скоро услыши мя. Вем, яко несмь достоин человеколюбия и милосердия Твоего, но достоин есмь мук, елико имать ад, достоин есмь червия неусыпающаго, скрежета зубнаго, тьмы кромешния, огня неугасимаго, диаволу и ангелом его уготованнаго. Достоин есмь тартара, егоже и сам сатана трепещет.
Обаче елико величество Твое, толика и милость Твоя, и несть грех, побеждающ человеколюбие Твое. Сего ради не отчаяваюся, но надеюся на Твою неисчерпаемую и непрестанно на всех неоскудне изливающуюся благодать и неизреченное милосердие; надеюся на Тя, Господи, и уповаю, да не постыжуся вовеки. Упование мое Ты еси, Боже, упование же не посрамляет.
Не посрами мя, Господи, на Страшнем Твоем Суде пред тьмами тем Небесных Сил и всех святых Твоих. Сердечне жалею, яко прогневах Тя, Создателя моего, вечную и нескончаемую благость злобами моими опечалих, и Егоже имех непрестанно любити и заповеди Твоя хранити, Сего, аки ненавидя, бесчисленным себе грехом вдах; Егоже имех желати усердно, о Сем едва мало когда помыслих и небрегох, Егоже имех сладостне насыщатися, Сего преогорчевах и отринух; к Немуже имех прилеплятися, от Того отторгохся; Емуже единому имех жити, Сему умрох, живу же греху, страстем и сластем; Егоже имех боятися и почитати, Сего преобидех и обесчестих в меньшей братии и в себе самом, всего себя скверня делы же, и словесы, и помышлении; Егоже имех благодарити и славословити непрестанно, при Нем пребывая, от Сего отвращахся, отбегох в пути развращенныя и ленихся отверсти уста на славу имени Его пресвятаго. О, желание мое! О, милостивый мой Боже!