Типикон

Месяц март,

имеяй дней 31. День имать часов 12, и нощь часов 12.

1. святыя преподобномученцы евдокии.

Аще есть четыредесятница, поем Аллилуиа, аще же ни, тропарь. На Господи воззвах стихиры, глас 4. Подобен: Дал еси знамение: Тропарь, глас 8: Правостию умною душу твою привязавши в любовь христову, тленных и красных и временных забытием претекла еси, яко слова ученица: пощением страсти первее умертвивши, страдальчески второе врага посрамила еси. тем Христос сугубых венца сподоби тя славная евдокие. преподобная страстотерпице, моли Христа бога спастися душам нашим.

На Утрени, канон, глас 2. По 3–й песни, Седален, глас 8. По 6–й песни,

Кондак, глас 4: Во страдании твоем добре подвизавшися, и по смерти нас освящаеши чудес излиянии, всехвальная, верою прибегающия в божественную церковь твою: и торжествующе молим тя, преподобная мученце евдокие, да избавимся недуг душевных, и чудес благодать почерпем.

И икос.

2. святаго священномученка феодота, епискпа киринейскаго.

Аллилуиа, или тропарь. Стихиры, глас 4. Подобен: яко добля: На Утрени, канон, глас 4. По 3–й песни, Седален, глас 4. По 6–й песни,

Кондак, глас 3: Море зловерия обличил еси, и идольскаго безбожия лесть верою правоверия уязвил еси. и всесожжение божественное быв, чудодействием орошаеши концы, отче святителю феодоте: Христа бога моли, даровати нам велию милость.

(:. В тойже день преставление иже во святых отца нашего арсениа, епискпа тверскаго.

Совершается собор его во твери.

Тропарь, глас 8: благочестно пожив во святительстве, люди просветил еси учением твоим: и о храме пречистыя вельми подвизався, и любитель монахов быв, сего ради от Христа паствы твоея венец приял еси. темже яко апостольскаго престола наместника и святителя великаго чтуще тя, молим чада твоя блаженне: от всех бед избави нас, яже ко христу молитвами твоими, святителю христов арсение Отче наш.

Кондак, глас 8: Восприемши радостно честныя твоя мощи пречистая церковь, в нюже честно вносими множеством священномонахов, и князи благоверными, и яже приемше, яко сокровище многоценное. темже и мы ныне твоея ограды словесныя овцы, окрест раки твоея предстояще, любезно вопием ти: не забуди чад твоих отче, ихже мудре собрал и возлюбил еси, яко да зовем ти: радуйся святителю арсение, пастырю и учителю наш.

3. святых мученк, евтропиа и дружины его, клеоника и василиска.

Аллилуиа, или тропарь. Стихиры, глас 1. Подобен: Всехвальнии:

4. преподобнаго отца нашего герасима, иже на иордане.

Стихиры, глас 8. Подобен: о преславнаго чудесе! На Утрени, канон, глас 8. По 3–й песни, Седален, глас 4. По 6–й песни,

Кондак, глас 4. Подобен: Вознесыйся: Возгоревся рачением горним, жестость пустыни иордановы паче всех мира сладких предпочел еси: отонудуже повинувся тебе зверь даже до смерти отче, послушне, и жалостне на гробе твоем скончася, прославльшу тя тако богу: к немуже моляся и о нас, отче герасиме, поминай.

5. святаго мученка конона.

Аллилуиа. Стихиры, глас 8. Подобен: о преславнаго чудесе! На Утрени, канон, глас 6. По 3–й песни, Седален, глас 8. По 6–й песни,

Кондак, глас 3: Чистотою яко ангел на земли пожив, отонудуже собеседник ангелом быти сподобился еси, и родители ко христову познанию привел еси: и единаго бога в Троице исповедав, пострадал еси до крове мучениче кононе, моли его непрестанно о всех нас.

6. святых 42 мученик, иже во аммории.

Аллилуиа: или тропарь. Стихиры, глас 4. Подобен: Званный свыше: Аще случится в субботу или в неделю, поются самогласны две: Слава, глас 2. церковь днесь торжествует: На стиховне, Слава, глас 6: Полк боговенчанен: Тропарь, глас 4: мученцы твои Господи: септемвриа в 20 день. На Утрени, канон, глас 8. По 3–й песни,

Кондак, глас 4. Подобен: Вознесыйся: На земли Христа ради страдальчествовавше, явльшеся благочестивии венечницы, небеса приясте жити в радости: всякую бо кознь вражию низложивше болезньми и кровьми ваших язв хвалящим свыше присно грехов разрешение подаваете.

Таже, Седален, глас 8. По 6–й песни,

Кондак, глас 2. Подобен: Вышних ищя: Новоявленныя звезды веры, за Христа усердно пострадавшия, похвальными венцы достойне вси венчаем, о нас молящияся христу: яко суще столпи, и забрала христианскаго начальства.

И икос. По 9–й песни, светилен святых.

7. святых священномученик, в херсоне епископствовавших: василиа, ефрема, капитона, евгениа, ефериа, и прочих.

Аллилуиа. Стихиры, глас 4. Подобен: Дал еси знамение: На Утрени, канон, глас 4. По 3–й песни, Седален, глас 3. По 6–й песни,

Кондак, глас 2. Подобен: В вышних живый: Светоносный день наста пастырей, епископстовавших светло в херсоне, ихже воспеваем праздник, пострадавших за христовы овцы. священномученцы молите пастыреначальника Христа, и нас причести деснаго овец стояния, да вопием вам: радуйтеся священнии отцы, за Христа кровь свою излиявшии.

8. преподобнаго отца нашего и исповедника феофилакта, епискпа никомидийскаго.

Аллилуиа. Стихиры, глас 1. Подобен: Всехвальнии: На Утрени, канон, глас 8. По 3–й песни, Седален, глас 8. По 6 песни,

Кондак глас 2. Подобен: Вышних ищя: Светильник светел показался еси в концех святителю феофилакте: единосущна отцу и духу слова ты проповедав, божественных отец собор уяснил еси, Троице угодник явился еси: ейже предстоя моли непрестанно о всех нас.

9. + святых 40 мученк, в севастийском езере мучившихся.

Вечер, на Господи воззвах, предваряет триоди самогласен дне дважды: и мученичен, и подобны 3. Посем стихиры мученков самогласны на 4, глас 2. Слава, глас тойже: Терпяще настоящая: 1–ю стихиру. И ныне, богородичен: Прейде сень: Вход. чтения дне, и святых 3: Тако глаголет господь, вси языцы: И прочее возследование преждесвященныя. [Смотри] Аще же не совершается преждесвященная, на Господи воззвах, поем стихиры на 6, триоди подобны 3, и мученков 3. Слава, святых: И ныне, богородичен: и по чтении: Сподоби Господи: и ектениа: Исполним вечернюю: На стиховне, триоди самогласен дне, дважды: и мученичен. Слава, святых, глас 6: В песнопениях восхвалим: И ныне, Богородице ты еси лоза: По Ныне отпущаеши: Тропарь, глас 1: Болезньми святых, имиже о тебе пострадаша, умолен буди Господи, и вся наша болезни исцели человеколюбче, молимся.

Слава, и ныне: Гавриилу вещавшу: ектениа, и 3 поклоны великия, и отпуст. На Утрени, на Бог господь, тропарь дважды. Слава, и ныне, богородичен, и обычныя кафисмы. По 1–й, и по 2–й кафисме, седальны триоди. ектений же не глаголем. По 3–й же кафисме глаголет иерей ектению малую. Таже седален, глас 4. Слава, ин: И ныне, богородичен: и чтение. По полиелеи седален, глас 5, дважды. Слава, и ныне, богородичен. Степенна, 1–й антифон 4–го гласа. Прокимен, глас 4: Проидохом сквозе огнь и воду: Стих: Разжегл ны еси, якоже разжизается сребро. Всякое дыхание: евангелие луки, зачало 106. По 50–м псалме стихира, глас 2: пророчески убо вопияше давид: Канона святых два со ирмосом на 8, глас 2. Катавасиа, отверзу уста моя: А идеже трипеснец, и поем каноны святых со ирмосом на 6: и триоди по чину их, на 8. Последи ирмос триоди. По 3–й песни, седален, глас 8, дважды. Слава, и ныне: богородичен. По 6–й песни,

Кондак глас 6. Подобен: еже о нас: Все воинство мира оставльше, на небесех владыце прилепистеся, страстотерпцы господни четыредесять: сквозе огнь бо и воду прошедше блаженнии, достойно восприясте славу с небес, и венцев множество.

И икос. По 9–й песни, светилен мученков: Слава, ин: И ныне, богородичен. На хвалитех стихиры, глас 5. Подобен: Радуйся: Слава, глас тойже: страстотерпцы христовы: И ныне, блажим тя Богородице Дево: На стиховне триоди самогласен дне, дважды: и мученичен. Слава, глас 2: Истины чашею: И ныне, Непроходимая дверь: Таже, благо есть: единожды. Трисвятое. тропарь святых. ектениа и 3 поклоны великия: час 1, с кафисмою, и отпуст. Во время же свое бывает, 3–й, 6–й, и 9–й час по чину их, с кафисмами: и блаженны поскору, и прочее. На коемждо часе по 3 поклоны великия. В тойже день вечера, по обычной кафисме, на Господи воззвах, ставим стихов 10. и поем триоди самогласен дне дважды, и мученичен, и подобны 3: и святых 4, глас 1: Лик четверодесятосиянный: дважды: глас 2: езеро яко рай: Слава, глас тойже: пророчески убо вопияше: И ныне богородичен: Все упование: Аще к среде или пятку, крестобогородичен: вход с евангелием. Прокимен дне, и чтение триоди. И Да исправится молитва моя: ектениа малая. Посем прокимен, глас еси Ты Господи сохраниши ны, и соблюдеши ны от рода сего и во век. Стих: спаси мя Господи, яко оскуде преподобный. Апостол ко евреем, зачало 331. Аллилуиа, глас 4: Воскликните господеви вся земля, пойте же имени его. Стих: яко искусил ны еси Боже, разжегл ны еси, якоже разжизается сребро. евангелие матфеа, зачало 80. и прочее божественная литургиа преждесвященных.