Страница 18 из 24
Возглас:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
По возгласе же священник развивает антиминс по обычаю.
Диакон:
Ели́цы оглаше́ннии, изыди́те.
Аще ли есть другий диакон, возглашает и той:
Оглаше́ннии, изыди́те.
Таже паки первый:
Ели́цы оглаше́ннии, изыди́те.
Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.
Лик: Го́споди, поми́луй.
Молящуся священнику, диакон [аще есть] глаголет ектению вне олтаря:
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Прему́дрость.
Молитва верных первая:
Ты, Го́споди, показа́л еси́ нам вели́кое сие́ спасе́ния та́инство. Ты сподо́бил еси́ нас, смире́нных и недосто́йных раб Твои́х, бы́ти служи́телем свята́го Твоего́ же́ртвенника. Ты удовли́ нас, си́лою свята́го Твоего́ Ду́ха, в слу́жбу сию́, да неосужде́нно ста́вше пред свято́ю сла́вою Твое́ю, принесе́м Ти же́ртву хвале́ния. Ты бо еси́ де́йствуяй вся во всех. Да́ждь, Го́споди, и о на́ших гресе́х, и о людски́х неве́дениих, прия́тней бы́ти же́ртве на́шей, и благоприя́тней пред Тобо́ю.
Священник, возглас:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
И паки диакон:
Па́ки и па́ки, ми́ром Го́споду помо́лимся.
Лик: Го́споди, поми́луй.
Егда священник един служит, сих не глаголет.
О свы́шнем ми́ре и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Диакон (без негоже иерей глаголет):
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Прему́дрость.
Молитва верных вторая:
Бо́же, посети́вый в ми́лости и щедро́тах смире́ние на́ше, поста́вивый нас смире́нных и гре́шных и недосто́йных раб Твои́х пред свято́ю сла́вою Твое́ю, служи́ти свято́му же́ртвеннику Твоему́. Ты укрепи́ нас си́лою Свята́го Твоего́ Ду́ха в слу́жбу сию́, и да́ждь нам сло́во во отверзе́ние у́ст на́ших, во е́же призыва́ти благода́ть Свята́го Твоего́ Ду́ха на хотя́щия предложи́тися Да́ры.
Священник глаголет возгласно:
Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Таяжде и зде творят и глаголют, священник же и диакон, якоже и в Литургии Златоустаго.
Молитва, юже глаголет священник тайно, Херувимской песни певаемей:
Никто́же досто́ин от связа́вшихся плотски́ми похотьми́ и сластьми́ приходи́ти, или́ прибли́житися, или́ служи́ти Тебе́, Царю́ Сла́вы: е́же бо служи́ти Тебе́, вели́ко и стра́шно и саме́м Небе́сным Си́лам. Но оба́че неизрече́ннаго ра́ди и безме́рнаго Твоего́ человеколю́бия, непрело́жно и неизме́нно был еси́ Челове́к, и Архиере́й нам был еси́: и служе́бныя сея́ и безкро́вныя же́ртвы священноде́йствие пре́дал еси́ нам, я́ко Влады́ка всех. Ты бо еди́н, Го́споди Бо́же наш, влады́чествуеши небе́сными и земны́ми, и́же на престо́ле Херуви́мсте носи́мый, и́же Серафи́мов Госпо́дь, и Ца́рь Изра́илев, и́же Еди́н свят, и во святы́х почива́яй. Тя у́бо молю́, Еди́наго блага́го и благопослушли́ваго: при́зри на мя, гре́шнаго и непотре́бнаго раба́ Твоего́, и очи́сти мою́ ду́шу и се́рдце от со́вести лука́выя, и удовли́ мя, си́лою свята́го Твоего́ Ду́ха, облече́на благода́тию свяще́нства, предста́ти святе́й Твое́й сей трапе́зе, и священноде́йствовати Свято́е и Пречи́стое Твое́ Те́ло и Честну́ю Кровь. К Тебе́ бо прихожду́ прикло́нь мою́ вы́ю, и молю́ Ти ся, да не отврати́ши лица́ Твоего́ от мене́, ниже́ отри́неши мене́ от о́трок Твои́х, но сподо́би принесе́нным Тебе́ бы́ти, мно́ю гре́шным и недосто́йным рабо́м Твои́м, даро́м сим.
Ты бо еси́ принося́й и приноси́мый, и прие́мляй и раздава́емый, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.
Исполньшимся же молитве и каждению, священник и диакон, ставше пред святою трапезою, глаголют Херувимскую песнь:
Священник: И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.
Диакон: Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.
А сие в Великий Четверток точию поется:
Ве́чери Твоея́ Та́йныя днесь, Сы́не Бо́жий, / прича́стника мя приими́: / не бо враго́м Твои́м та́йну пове́м, / ни лобза́ния Ти дам я́ко Иу́да, / но я́ко разбо́йник испове́даю Тя: / помяни́ мя, Го́споди, во Ца́рствии Твое́м. Аллилу́иа, аллилу́иа, аллилу́иа.
В Великую же Субботу поют сие:
Да молчи́т вся́кая плоть челове́ча, / и да стои́т со стра́хом и тре́петом, / и ничто́же земно́е в себе́ да помышля́ет: / Царь бо ца́рствующих, и Госпо́дь госпо́дствующих, / прихо́дит закла́тися и да́тися в снедь ве́рным. / Предхо́дят же Сему́ ли́цы А́нгельстии / со вся́ким Нача́лом и Вла́стию, / многоочи́тии Херуви́ми, / и шестокрила́тии Серафи́ми, / ли́ца закрыва́юще, и вопию́ще песнь: / аллилу́иа, аллилу́иа, аллилу́иа.
И зде священник же и диакон таяжде творят и глаголют, якоже в Литургии Златоустаго. Скончаным же бывшим молитвам, и великому входу, диакон приходит на обычное место, глаголя:
Испо́лним моли́тву на́шу Го́сподеви.
Лик: Го́споди, поми́луй.
О предложе́нных Честны́х Даре́х, Го́споду помо́лимся.
Лик: Го́споди, поми́луй.
О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Дне всего́ соверше́нна, свя́та, ми́рна и безгре́шна, у Го́спода про́сим.
Лик: Пода́й, Го́споди.
А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.
Лик: Пода́й, Го́споди.
Проще́ния и оставле́ния грехо́в и прегреше́ний на́ших, у Го́спода про́сим.
Лик: Пода́й, Го́споди.
До́брых и поле́зных душа́м нашим, и ми́ра мiрови, у Го́спода про́сим.
Лик: Пода́й, Го́споди.
Про́чее вре́мя живота́ на́шего в ми́ре и покая́нии сконча́ти, у Го́спода про́сим.
Лик: Пода́й, Го́споди.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.
Лик: Пода́й, Го́споди.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва приношения, по поставлении на святем престоле Божественных Даров, юже священник глаголет тайно:
Го́споди Бо́же наш, созда́вый нас и введы́й в жизнь сию́, показа́вый нам пути во спасе́ние, дарова́вый нам Небе́сных Та́ин открове́ние. Ты бо еси́ положи́вый нас в слу́жбу сию́, си́лою Ду́ха Твоего́ Свята́го. Благоволи́ у́бо, Го́споди, бы́ти нам служи́телем но́ваго Твоего́ Заве́та, слуга́м святы́х Твои́х Та́инств. Приими́ нас, приближа́ющихся свято́му Твоему́ же́ртвеннику, по мно́жеству ми́лости Твоея́, да бу́дем досто́йни приноси́ти Тебе́ слове́сную сию́ и безкро́вную же́ртву о на́ших согреше́ниих и о людски́х неве́жествиих: ю́же прие́м во святы́й и пренебе́сный, и мы́сленный Твой же́ртвенник, в воню́ благоуха́ния, возниспосли́ нам благода́ть Свята́го Твоего́ Ду́ха. При́зри на ны, Бо́же, и ви́ждь на слу́жбу сию́ на́шу, и приими́ ю́, я́коже прия́л еси́ А́велевы да́ры, Но́евы же́ртвы, Авраа́мова всепло́дия, Моисе́ова и Ааро́нова свяще́нства, Самуи́лова мирная. Я́коже прия́л еси́ от святы́х Твои́х Апо́стол и́стинную сию́ слу́жбу, си́це и от ру́к нас, гре́шных, приими́ Да́ры сия в бла́гости Твое́й, Го́споди, я́ко да сподо́бльшеся служи́ти без поро́ка свято́му Твоему́ же́ртвеннику, обря́щем мзду ве́рных и му́дрых строи́телей в день стра́шный воздая́ния Твоего́ пра́веднаго.