Страница 2 из 5
Тако бо и пастырие творят, дондеже убо ничто же забавляет им зверь, под дубом или под смерьчием себе повергьше, тростию свиряют, оставльше на власти всяцей овца пастися: внегдаже волком нахожение ощутять бывшее, въскоре трость повергъше[2], пращу восхищают и свирель оставльше, дреколми и камением себе въоружают, и пред стадом ставше, и велми ужасне воскликнувше гласом множицею преже врьжения зверя отгнавше.
Тако убо и нам подобает творити, иже христово стадо пасущим, пастырем же и учителем. Егда убо видят невернаго или еретика, никоего же вреда душевнаго не творяще верным, тогда и они, в травнице некоем книжных повестей поучяющеся, с смирением же и кротостию да наказують неверныа и еретики; егда же видять иже всех волков лютейших окаянныя еретики, хотящих христово стадо погубите и разтлити еретическими июдейскими учении, тогда подобает им всяко тщание и ревность показати, яко да ни едино овчя Христова стада зверьми въсхищено будет.
Зри, яко о сем глаголет священный Златоуст. Егда невернии и еретици никого же от православных прельщают, тогда недостоит им зло творити или ненавидети их; егда же узрим неверныя же и еретики, хотящих прелстити православныя, тогда подобает не точию ненавидети их, или осужати, но и проклинати и язвити, и сим руку свою освятити. Яко же повелевает сам той священный Златоуст, глаголя сице: «Понеже о хулении нам слово бысть, иже на единороднаго сына божиа, ныне же единого от вас хощу просити дара, да хулящая вся иже во граде да накажете.
Аще услышиши некоего на распутии, или на торгу среди накажете. Аще услышиши некоего на распутии, или на торгу среди народа, владыку Христа хуляща, приступив запрети; аще и язвы ему наложити подобает, не отмещися, зауши, сокруши его уста, освяти си руку язвою; аще и поемлют неции, и аще на суд влекут, въследуй; аще и на суде въпросят, сиречь судии истяжет, глаголи з дерзновением, яко же царя аггельскаго похулил есть; аще бо хулящаго земнаго царя мучити подобает, велми паче, иже хулящих небеснаго царя. Общий есть грех всех есть бесправдие.
Подобает же комуждо от хотящих оглаголавати, да уведят и жидове и поругании еретици, яко спасители суть граду кристьяне, и строители, и заступници, и учители. Да уведят се не утомлении и развращении жидове и еретици, яко божиих раб боятися тем подобает, да, аще изволят когда извещати нечто таково, друг на друга взирают всюду, и стеней трепещут, страхующеся, егда где христиан услышат.
Не слышали, что Иоан сътвори, мучителя виде человека, брачныя законы отметающа, з дерзновением посреди тръжища рече: Не подобно ти есть имети жену Филиппа брата своего. Аз же не о человецех приведох слово, ни о судии, ни о брацех беззаконнующих, но о владычней досаде. Аще убо и умрети подобает, наказовати брата своего не обленися, мучительство убо и то есть за Христа.
Понеже Иоан мученик есть, аще и пожрети не повелен бысть, ни поклонитися идолом, но егда виде божественна законы попираемы, и того ради душю свою положи». И паки той же глаголеть: «Возлюблении, многажды вам глаголах о безбожных еретицех и ныне молю, не совокуплятися с ними ни вь ядении, ни в питии, ни в дружбе, ни в любви: творя бо сиа, чюжа себе творит Христовы церькви.
Аще хто и бесплотных житие поживет, еретиком же приобщаяся в дружбе или в любви, таковый чюжь есть владыки Христа; яко же убо сытости не имамы владыку Христа любити, такоже не . имамы сытости враги его ненавидети. Глаголеть бо сам: иже несть со мною, на мя есть». Сиа убо глаголеть и повелевает священный Златоуст, от святых апостол вину прием.
Тако бо и святии апостоли творяху.
Пишет бо ся в деяниих святых апостол, яко, егда прииде в Самарию святый апостол Петр и Иоан, тогда Симон вълъхов принесе им сребро, глаголя: «Дадите ми власть сию, да на него же аще положу руце, приимет дух свят»; тогда убо святии апостоли не осудиша его на смерть, но егда прииде в конечное нечестие, еже развратити благочестивыя и прельстити верующая, тогда смертию осужаеться. Тако же и святый Иоан Богослов сътвори.
Егда убо Куноп в своем месте живяше, и никого же от верных не прелщаше, не осужен бысть; егда же прииде в град, иский развратити верующая, тогда осужен бысть на смерть. Тако же и святый апостол Филипп, не прииде к архиерею, ниже осуди его, но егда виде архиереа, пришедша не иного чего ради, но токмо благочестивыя чествующая развратити, тогда смертию осужен бысть.
Подобно же тому святый апостол Павел сотвори: не поискав Еллима влъхва и не осуди, ниже уничижи; но егда виде его ищуща развратити Анфипата от веры, тогда осуди его, иже слепу быти и не видети солнца. Подобно же тому святии и преподобнии и богоноснии[а] отци наши и священноначялницы и пастырие творяху. Святый убо Иоанн Златоустый, егда виде арианы, живуща в Констяньтине граде и никому же от православных пакости не творяще, тогда Иоанн ничтоже зла сотвори им; егда же виде их, творящих прелщения, и некоторая пения же и песни сотворша, яко да едносущныя смутят, тогда умоли царя, яко да ижденет их из града.
Такоже и святый Порфирие, епископ Газьский, егда виде в Газе еретики живуща манихейская мудръствующе, и никого же от православных прельщающе, тогда и он не осуди их; егда же виде их, сего ради пришедша к нему, яко да християны прельстят, тогда и он осужает их преже онемлением, потом же смертию. Такоже святый Лев епископ Катаньский, Лиодора еретика преже не осуди на смерть, но егда виде его пришедша к церкви, некоторая мечтания творяща, яко да благочествующая прельстит, он же изыде из церкви, и сотвори Лиодора огнем съжжена быти, и паки вниде в церковь, и соврьши божественую служьбу.
Тако же и святый Феодор Едесскый епископ, егда виде множество еретик вь Едесе, православных не творяща многа зла, тогда и он не сотвори им ничто же зло; егда же виде их и на толико зло пришедших, яко да православныя прельстят и церковная имения разграбят, тогда и в Вавилон отиде, и царя умоли, яко да еретики потребит. И многа суть такова в божественом писании, яко егда еретицы суше в себе ереси имущаа, православным пакости не творяща, тогда святии и преподобнии отци наши сих не осужаху; егда же узрят неверныя же и еретики, хотящих прельстити православныя, тогда осужаху их. Тако убо подобает и нам творити. [б] И сиа убо о сих.
[б]
Прочее же речем и о сем, еже той же великий церковъный учитель святый Иоанн Златоустый[а] глаголеть, еже не достоит убивати еретики; аще быхом убивали еретики, рать несмирна была во вселенней. Сиа глаголеть о епископех и о священницех, и о иноцех, и о всех церковных причетницех, а не о царех, ниже о князех и о судиях земьских. Аще бы глаголал о царех и о князех и о судиях, рекл бы, яко не подобает царем и князем и судиям убивати еретики; ныне же глаголеть: «Аще быхом убивали еретики», се явьствено показует, яко о епископех, и о священницех и о иноцех, и о причетницех церковных глаголеть; сам бо той бяше иреже причетник церковный и инок, потом же и священник, таже и епископ.
Того ради, и всех сих лице на себе въсприим, глаголеть: «Аще быхом убивали еретики мы, рать несмиръна была бы», а не о царех, ни о князех, ни о судиях земьских сиа глаголеть. О царех убо и о князех и о судиях и святии апостоли глаголють, яко они власть приаша от господа бога, в отмщение злодеем, в похвалу же добротворящим. Глаголеть убо врьховный апостол Петр: «Повинитися убо всякому человеческому зданию господа ради, сиречь человеческой власти; аще царю, яко преобладающу; аще князем, яко посылаемом от него, в отмщение убо злодеем, в похвалу же добротворящим.
Тако бо есть воля божиа, благотворящим обуздовати безумных человек неразумие». Подобно же тому и Павел глаголеть: «Князи бо не суть боязнь благым делом, но злым. Хощеши ли не боятися власти? Благое твори, и имаши похвалу от нея: божий бо слуга есть ти в благое. Аще ли же злое творити, бойся, не бо без ума мечь носит. Божий бо служитель есть, отмъститель в гнев злое творящиму».
Подобно же тому и святии отци глаголють. Священный убо Златоуст сице рече: «На ползу убо людем земленое начяльство поставися от бога, а не от диавола, яко же неции неподобнии глаголют, да боящеся человеци не поглощают друг друга, яко же рыбы. Того бо ради глаголет святый апостол Петр, яко тако есть воля божиа, благотворящим обуздовати безумных человек неразумие».
Тако же глаголет святый Григорие Акраганьский епископ, во своих правилных завещаниих: «Велие убо суть в человецех дарование божие свыше дано человеколюбие, священничество же и царство; ово убо божественым служа, ово же человечьскими обладая пекий ся. Подобает приемшему от вышняго повелениа правление человечьскаго рода, не токмо о своих пещися ни своего житиа правити, но и все обладаемое от треволнениа спасати, и многогреховнаго смятения потопляющим отвсюду лукавым духом, и тело смиренна нашего смущающим».