Страница 9 из 10
И тогда восплачются вся колена земная, и узрят сына человеческаго, грядущаго на облацех небесных с силою и славою многою. И послет анггелы своя с трубным гласом велиим, и соберут избранныя его от четырех ветр, от конец небес и до конец их». И инде глаголет: «Яко же убо собирают плевелы и огнем съжигают, тако будет в скончяние века сего. Послет ангелы своя сын человеческий, и соберут от царствиа его вся соблазны, и творящая беззаконие.
И ввергут их в пещь огнену; ту будет плачь и скрежеть зубом. Тогда праведницы просветятся яко солнце в царствии отца их». И паки рече: «Егда приидет сын человеческий в славе своей, и вси святии ангели с ним, тогда сядет на престоле славы своея. И соберутся пред ним вся языцы. И о дни же том и чясе никто же весть, ни ангели небеснии, токмо отец мой един.
Бдите убо, яко не весте, в кий чяс господь вашь приидет!». И паки рече: «Сего ради и вы будите готови, яко в он же чяс не мните, сын человеческий приидет». От Марка: «Услышати же имате брани, и слышаниа бранем, не ужасайтеся: подобает бо быти. Будут бо дние тии скорбь, яко не бысть такова от начяла созданию, еже созда бог, до ныне[34], и не будет. Аще не бы господь прекратил дней тех, не бы убо спаслася всяка плоть».
От Луки: «И будут знамениа в солнци и луне и звездах, и на земли — туга языком и от не чяаниа шума морьскаго и возмущенна; издыхающим человеком — от страха и чяания грядущих на вселенную: силы[35] небесныа подвигнутся. И тогда узрят сына человеческаго грядуща на облацех с силою и с славою многою. Внемлете же себе, да некогда отягчают сердца ваша обьядением и пьаньством и печяльми житейскими, и найдет на вас внезапу день той; яко сеть бо приидеть на вся живущая на лице всея земли.
Бдите убо на всяко время молящеся, да сподобитеся убежати всех сих хотящих быти, и стати пред сыном человеческим». Се убо от святых еуангелий мало написахом.
Да разумевши же и святых апостол речениа, подобна пророческим и еуангельским писанием. Иаков брат божий: «Долготерпите убо, братие, и утвердите сердца ваша, яко пришествие господне приближися.
Не воздыхайте друг на друга, да не осужени будете: се судиа пред дверми стоит». Петр: «Приидет же день господень, яко тать в нощи. В онь же небеса искорене мимо идут, стихия сожигаемы разорятся, земля и яже на ней дела згорят». И инде глаголеть: «Всем же кончина приближися,— уцеломудритеся убо и трезвитеся в молитвах». Павел: «Яко день господень, яко же тать в нощи, тако приидет.
Егда бо рекут: мир и утвержение, тогда внезапу нападет их всегубительство и пагуба, яко же болезнь в чреве имущой, не имать избежати». И инде глаголет: «Во откровении господа Иисуса с небесе с ангелы силою своею, в огни пламенне дающему отмщение неведущим бога, и не послушающим благовествование господа нашего Иисуса Христа». И паки глаголет: «Соблюсти заповедь нескверну и незазорну, до явленна господа нашего Иисуса Христа, еже в своя времена явит един силный, царь царствующих и господь господьствующих, един имеяй бесмертие, во свете живый неприступне.
Засведетельствую убо аз пред господом нашим Иисусом Христом, хотящим судити живым и мертвым по просвещению его и царь ствию его». И паки рече: «Еще мало грядый приидет и неукоснит. А праведный же от веры жив будет. И толико паче молящеся елико видите приближающься день. Страшно же некое чаяние суда и огня зависть поясти хотя противныя, и яко судит господь людем своим, и страшно, еже впасти в руце бога живаго.
Живо бо слово божие и действено и острейше паче всякого мечя обоюду остра, и проходя до разделениа души же и духа, членов же и мозгов, и судиво помышлением и мыслем сердечным. И несть тварь не видима пред ним, вся же нага и отверста пред очима его, к нему же нам слово». И паки глаголет: «Да никто же вас прельстит ни по единому же образу; яко аще не приидет отступление преже, и открыется человек беззаконна, сын погибели, противник и превозносяйся на всякого глаголемаго бога или чтилища, яко же ему сести в церкви божий яко богу, показуя себе, яко бог есть.
Не помните ли, еще сый в вас, сиа глаголах вам, и ныне одержащее весте, явитися ему во свое ему время, его же господь убьет духом уст своих, и упразнит явлением пришествиа своего. Тем же убо, братие, стойте о господе и держите преданна, им же научистеся от нас, аще словом, аще посланием нашим». Се убо апостольскаа учениа.
Слыши же и святаго Ефрема писаниа, подобна пророческому и еуангельскому и апостольскому писанию.
Ефрем: «Се убо при дверех стоит господь сотворити кончину веку суетному, и труба небесная готова есть, созывающи повелением божиим, силы небесныя готови стоят, по повелению приити, со страхом грядущаго на облацех небесных[36] судити живым и мертвым. И се господь спаситель наш приидет яко молнии, блистающися с небеси на облацех, с славою неизмерною текущим пред славою его чином ангельским и архангельским, суще вси пламень огнен, и река огнена исходящи от востока с яростию, яко же сверепое море, изжигающа горы и изравнающа, пожигающа землю и яже на ней дела.
Тогда, братие моя, от огня того источницы пресякнут, море исхнет, воздух потрясется, звезды спаднут с небеси, солнце исчезнет, луна преложится в кровь, небеса совиются в свиток. Тогда предтекут молния ангельским полком и тмы тмами ангел и архангел, и тысяща тысящами бесчисленая воиньетва небесная, и херувим и серафим, многоочитая крепким гласом, вопиют: Свят, свят, свят господь Саваоф, сый святый вседержитель!
И глас трубы глаголющ со грозою, и кличь велик с небеси, глаголя: Се судиа приближается, се великий царь является, се всех бог грядет судити вселенней и воздати комуждо по делом его! Тогда всяка вещь на небеси и на земли и под землею, крепко вопиют: Благословен грядый царь во имя господне! Тогда разступятся небеса и явится царь царствующим и господь господствующим, яко молнии гордая с силою великою и безчисленою славою».
И инде глаголет: «Яко молнии блеснет, тако есть и пришествие Христово и не будеть возвещающаго: сей день или он день. И тогда кождо плачяся речет, глаголя: О люте мне, о люте мне, грешному, погубившему дни своя. Вся бо земля тогда трепещет, яко вода морская от лица славы его». И паки глаголет: «Егда небеса раздираема разливаются, стихия же палимы истают, земля и яже на ней дела попа ляются, егда звезды яко же листвие спадут, солнце и месяц померкнета, и егда явится сын божий с небесе с яростию и со гневом непостоянным, сядет на престоле славы своея и призовет землю от востока и до запада и воздаст комуждо по делом его. О люте мне, о люте мне!
Где тогда злато и сребро, где тогда красота ризная, где царие и князи и воеводы, где похоть плотская, греховная, и скверная[37], воистину и мерзъская, где пища и питие?». И инде же глаголет: «Градове потопоша[38] и места опустеша от гнева божиа, и никако же устрашихомся. Солнце единою и двократы полудне омрачися на нас, но и тако не убояхомся. Брани перьскиа и варварскиа приидоша и пусту сотвориша страну нашу, да мы ся бога убоим и приидем к покаянию.
Вся пророчества и писаниа вся скончяшася, при дверех есть година всех нас, и реченная знамениа вся соверши и несть ино ничто же прочее, токмо суперника нашего, еже есть антихристова слава. Тогда восплачется люте всяка душа и воздыхает горко. Егда видят вси скорбь без утехи, тогда будет внутрь страх и вне трепет, на путех плачь и в домех рыдание, на путех горе, в домех горе!».
Се убо пророческая и еуангельская и апостольская и святаго Ефрема писаниа, — тая же о тех же глаголют! Ты же, оставив пророческая и еуангельская и апостольская речениа, едина списаниа святаго Ефрема истязуеши и глаголеши, яко тысяща и сто лет преиде, отнели же написал есть сиа святый Ефрем, а втораго Христова пришествиа несть. Сего же почто не разумевши, яко 5000 лет и вящьше уже преиде, егда написал есть о сих праведный Енох, и три тысящи лет преидоша, егда рекл есть о тех же великий Моисий, и 2000 и 500 лет преиде, егда написал есть о сем святый Давыд, и 2000 лет и множае преидоша, егда написаша о сих святии пророцы, и тысяща и 500 лет преидоша, отнели же быша еуангельская и апостольская писаниа.
Последняго же есть[39] неразумиа знамение и зависти и лукавьства указание, яко тая же и о тех же рекших, овех похваляти, овех же укоряти. Аще истязуеши списаниа святаго Ефрема, истязуй и пророческая и еуангельская и апостольская и вся божественая писаниа! Но яко же убо истинно есть пророческое и еуангельское и апостольское писание, тако истинно есть и ничто же ложно святаго Ефрема писание: обычно же есть божественому писанию о грядущих, яко о настоящих, глаголати.
Яко же рече господь наш Иисус Христос: «Не веруяй в сына божиа уже осудися». А еще несть суда, ни муки, како убо осудися? И паки: «Веруяй в сына божиа, преиде от смерти в живот». Не рече: «Преидет», но — уже «преиде»! Яко же бо он осудися, еще не сущу суду? Тако и сей — преиде от смерти в живот и еще не умер. И святый Давыд глаголет: «Бог богом господь глагола, и призва землю от восток солнца до запад».