Страница 37 из 89
40 И слышаша от фарисей сия сущии с ним и реша ему: еда и мы слепи есмы?
41 Рече им Иисус: аще бысте слепи были, не бысте имели греха: ныне же глаголете, яко видим, грех убо ваш пребывает.
Глава 10
1 Аминь, аминь глаголю вам: не входяй дверьми во двор овчий, но прелазя инуде, той тать есть и разбойник:
2 а входяй дверьми пастырь есть овцам:
3 сему дверник отверзает, и овцы глас его слышат, и своя овцы глашает по имени, и изгонит их:
4 и егда своя овцы ижденет, пред ними ходит: и овцы по нем идут, яко ведят глас его:
5 по чуждем же не идут, но бежат от него, яко не знают чуждаго гласа.
6 Сию притчу рече им Иисус: они же не разумеша, что бяше, яже глаголаше им.
7 Рече же паки им Иисус: аминь, аминь глаголю вам, яко аз есмь дверь овцам.
8 Вси, елико (их) прииде прежде мене, татие суть и разбойницы: но не послушаша их овцы.
9 Аз есмь дверь: мною аще кто внидет, спасется, и внидет и изыдет, и пажить обрящет.
10 Тать не приходит, разве да украдет и убиет и погубит: аз приидох, да живот имут и лишше имут.
11 Аз есмь пастырь добрый: пастырь добрый душу свою полагает за овцы:
12 а наемник, иже несть пастырь, емуже не суть овцы своя, видит волка грядуща и оставляет овцы и бегает, и волк расхитит их и распудит овцы:
13 а наемник бежит, яко наемник есть и нерадит о овцах.
14 Аз есмь пастырь добрый: и знаю моя, и знают мя моя:
15 якоже знает мя Отец, и аз знаю Отца: и душу мою полагаю за овцы.
16 И ины овцы имам, яже не суть от двора сего, и тыя ми подобает привести: и глас мой услышат, и будет едино стадо (и) един пастырь.
17 Сего ради мя Отец любит, яко аз душу мою полагаю, да паки прииму ю:
18 никтоже возмет ю от мене, но аз полагаю ю о себе: область имам положити ю и область имам паки прияти ю: сию заповедь приях от Отца моего.
19 Распря же паки бысть во иудеех за словеса сия.
20 Глаголаху же мнози от них: беса имать и неистов есть: что его послушаете?
21 Инии глаголаху: сии глаголголи не суть беснующагося: еда может бес слепым очи отверсти?
22 Быша же (тогда) обновления во Иерусалимех, и зима бе.
23 И хождаше Иисус в церкви, в притворе соломони.
24 Обыдоша же его иудее и глаголаху ему: доколе душы нашя вземлеши? аще ты еси Христос, рцы нам не обинуяся.
25 Отвеща им Иисус: рех вам, и не веруете: дела, яже аз творю о имени Отца моего, та свидетелствуют о мне:
26 но вы не веруете, несте бо от овец моих, якоже рех вам:
27 овцы моя гласа моего слушают, и аз знаю их, и по мне грядут:
28 и аз живот вечный дам им, и не погибнут во веки, и не восхитит их никтоже от руки моея:
29 Отец мой, иже даде мне, болий всех есть, и никтоже может восхитити их от руки Отца моего:
30 аз и Отец едино есма.
31 Взяша же камение паки иудее, да побиют его.
32 Отвеща им Иисус: многа добра дела явих вам от Отца моего: за кое их дело камение мещете на мя?
33 Отвещаша ему иудее, глаголюще: о добре деле камение не мещем на тя, но о хуле, яко ты, Человек сый, твориши себе Бога.
34 Отвеща им Иисус: несть ли писано в законе вашем: аз рех: бози есте?
35 Аще оных рече богов, к нимже слово Божие бысть, и не может разоритися писание:
36 егоже Отец святи и посла в мир, вы глаголете, яко хулу глаголеши, зане рех: Сын Божий есмь.
37 Аще не творю дела Отца моего, не имите ми веры:
38 аще ли творю, аще и мне не веруете, делом (моим) веруйте: да разумеете и веруете, яко во мне Отец, и аз в нем.
39 Искаху убо паки яти его: и изыде от рук их,
40 и иде паки на он пол иордана, на место, идеже бе иоанн прежде крестя, и пребысть ту.
41 И мнози приидоша к нему и глаголаху, яко иоанн убо знамения не сотвори ни единаго: вся же, елика рече иоанн о сем, истинна бяху.
42 И мнози вероваша в него ту.
Глава 11
1 Бе же некто боля лазарь от вифании, от веси мариины и марфы сестры ея.
2 Бе же мариа помазавшая Господа миром и отершая нозе его власы своими, еяже брат лазарь боляше.
3 Посласте убо сестре к нему, глаголюще: Господи, се, егоже любиши, болит.
4 Слышав же Иисус рече: сия болезнь несть к смерти, но о славе Божии, да прославится Сын Божий ея ради.
5 Любляше же Иисус марфу и сестру ея и лазаря.
6 Егда же услыша, яко болит, тогда пребысть на немже бе месте два дни.
7 Потом же глагола учеником: идем во иудею паки.
8 Глаголаша ему ученицы: равви, ныне искаху тебе камением побити иудее, и паки ли идеши тамо?
9 Отвеща Иисус: не два ли надесяте часа еста во дни? аще кто ходит во дни, не поткнется, яко свет мира сего видит:
10 аще же кто ходит в нощи, поткнется, яко несть света в нем.
11 Сия рече и посем глагола им: лазарь друг наш успе: но иду, да возбужу его.
12 Реша убо ученицы его: Господи, аще успе, спасен будет.
13 Рече же Иисус о смерти его: они же мнеша, яко о успении сна глаголет.
14 Тогда рече им Иисус не обинуяся: лазарь умре:
15 и радуюся вас ради, да веруете, яко не бех тамо: но идем к нему.
16 Рече же фома, глаголемый близнец, учеником: идем и мы, да умрем с ним.
17 Пришед же Иисус, обрете его четыри дни уже имуща во гробе.
18 Бе же вифаниа близ Иерусалима, яко стадий пятьнадесять,
19 и мнози от иудей бяху пришли к марфе и марии, да утешат их о брате ею.
20 Марфа убо егда услыша, яко Иисус грядет, срете его: мариа же дома седяше.
21 Рече же марфа ко Иисусу: Господи, аще бы еси зде был, не бы брат мой умерл:
22 но и ныне вем, яко елика аще просиши от Бога, даст тебе Бог.
23 глагола ей Иисус: воскреснет брат твой.
24 Глагола ему марфа: вем, яко воскреснет в воскрешение, в последний день.
25 Рече (же) ей Иисус: аз есмь воскрешение и живот: веруяй в мя, аще и умрет, оживет:
26 и всяк живый и веруяй в мя не умрет во веки. Емлеши ли веру сему?
27 Глагола ему: ей, Господи: аз веровах, яко ты еси Христос Сын Божий, иже в мир грядый.
28 И сия рекши, иде и пригласи марию сестру свою тай, рекши: учитель пришел есть и глашает тя.
29 Она (же) яко услыша, воста скоро и иде к нему.
30 Не уже бо бе пришел Иисус в весь, но бе на месте, идеже срете его марфа.
31 Иудее (же) убо сущии с нею в дому и утешающе ю, видевше марию, яко скоро воста и изыде, по ней идоша, глаголюще, яко идет на гроб, да плачет тамо.
32 Мариа же яко прииде, идеже бе Иисус, видевши его, паде ему на ногу, глаголющи ему: Господи, аще бы еси был зде, не бы умерл мой брат.
33 Иисус убо, яко виде ю плачущуся и пришедшыя с нею иудеи плачущя, запрети духу и возмутися сам
34 и рече: где положисте его? Глаголаша ему: Господи, прииди и виждь.
35 Прослезися Иисус.
36 Глаголаху убо жидове: виждь, како любляше его.
37 Нецыи же от них реша: не можаше ли сей, отверзый очи слепому, сотворити, да и сей не умрет?
38 Иисус же паки претя в себе, прииде ко гробу. Бе же пещера, и камень лежаше на ней.
39 глагола Иисус: возмите камень. Глагола ему сестра умершаго марфа: Господи, уже смердит: четверодневен бо есть.
40 глагола ей Иисус: не рех ли ти, яко аще веруеши, узриши славу Божию?
41 Взяша убо камень, идеже бе умерый лежя. Иисус же возведе очи горе и рече: Отче, хвалу тебе воздаю, яко услышал еси мя:
42 аз же ведех, яко всегда мя послушаеши: но народа ради стоящаго окрест рех, да веру имут, яко ты мя послал еси.
43 И сия рек, гласом великим воззва: лазаре, гряди вон.
44 И изыде умерый, обязан рукама и ногама укроем, и лице его убрусом обязано. глагола им Иисус: разрешите его и оставите ити.
45 Мнози убо от иудей пришедшии к марии и видевше, яже сотвори Иисус, вероваша в него:
46 нецыи же от них идоша к фарисеом и рекоша им, яже сотвори Иисус.
47 Собраша убо архиерее и фарисее сонм и глаголаху: что сотворим? яко Человек сей многа знамения творит:
48 аще оставим его тако, вси уверуют в него: и приидут римляне и возмут место и язык наш.
49 Един же некто от них каиафа, архиерей сый лету тому, рече им: вы не весте ничесоже,
50 ни помышляете, яко уне есть нам, да един человек умрет за люди, а не весь язык погибнет.
51 Сего же о себе не рече, но архиерей сый лету тому, прорече, яко хотяше Иисус умрети за люди,
52 и не токмо за люди, но да и чада Божия расточеная соберет во едино.
53 От того убо дне совещаша, да убиют его.
54 Иисус же ктому не яве хождаше во иудеех, но иде оттуду во страну близ пустыни, во ефрем нарицаемый град, и ту хождаше со ученики своими.
55 Бе же близ пасха иудейска, и взыдоша мнози во Иерусалим от стран прежде пасхи, да очистятся.
56 Искаху убо Иисуса и глаголаху к себе, в церкви стояще: что мнится вам, яко не имать ли приити в праздник?
57 Даша же архиерее и фарисее заповедь, да аще кто ощутит (его), где будет, повесть, яко да имут его.
Глава 12
1 Иисус же прежде шести дний пасхи прииде в вифанию, идеже бе лазарь умерый, егоже воскреси от мертвых.
2 Сотвориша же ему вечерю ту, и марфа служаше: лазарь же един бе от возлежащих с ним.
3 Мариа же приемши литру мира нарда пистика многоценна, помаза нозе Иисусове, и отре власы своими нозе его: храмина же исполнися от вони масти (благовонныя).